Býlingshúsið á Ternuryggi

Býlingshúsið á Ternuryggi liggur ovarlaga í ein norðan í Tórshavn. Umhvørvið á Ternuryggi er sera vakurt. Vit liggja høgt uppi í Havnini, har vit hava vítt til veggja. Garðurin er rúmligur. Vit hava tvey sandkassaøki; eitt til barnagarðsbørn og eitt til vøggustovubørn. Harumframt hava vit eitt stórt lendi, ið bæði er slætt og ójavnt. Kring økið eru ymisk fitt hús, trø at spæla í, ein stórur fótbóltsvøllur, og frítt er at ferðast kring allan stovnin. Uttan fyri stovnin eru alskyns møguleikar, bæði í nærumhvørvinum og í fjarumhvørvinum. Í nærumhvørvinum býr ein bóndi, sum vit vitja, og ein fittur djóragarður við nógvum spennandi kríatúrum liggur eitt hanagleiv frá okkum. Í grannalagnum eru eisini tveir aðrir dagstovnar, sum vit javnan vitja. Í Býlingshúsinum á Ternuryggi eru tvær barnagarðsstovur og ein vøggustova. Vit hava tvey felagsrúm; eitt stórt og eitt minni. Vit hava ein deiligan køk, har stovurnar fyrireika millummála saman við børnunum. Á stovninum hava vit eitt sansarúm, sum vit nýta saman við børnunum. Í sansarúminum menna børnini hoyrisansin, við til dømis ljóði og sangi og tann taktila sansin, sum er at merkja ymiskt móti húðini, sum til dømis sand, perlur, mat, toy. Á stovninum er eisini ein verkstaður. Her arbeiða vit ofta við ymiskum verkætlanum, sum til dømis at mála ymiskt, vit hava sæð á túrum, byggja og evna ymiskt, ið skal nýtast til ymisk endamál.

Námsfrøðingur

Tórshavnar kommuna sóknast vegna Býlingshúsið á Ternuryggi eftir einum námsfrøðingi at arbeiða 30 tímar um vikuna í barnagarðsstovu við 17 børnum. Tú kemur at starvast saman við trimum starvsfólkum, harav ein er námsfrøðingur og hini hjálparfólk.

Býlingshúsið á Ternuryggi hevur eina vøggustovu og tvær barnagarðsstovur, og arbeiða tað 13 dugnalig, faklig og drúgv starvsfólka, sum hava verið fleiri ár á stovninum. Ein góður samansettur starvsfólkahópur, sum trívist, samstarvar og hevur ávirkan á námsfrøðiliga gerandisdagin. Býlingshúsið á Ternuryggi er eitt livandi stað, har menning og upplivingar hava frítt spæl. Relatiónir, nærvera og spæl eru týðandi partar av okkara arbeiði, so børn og vaksin trívast og mennast í tryggum umhvørvi.

Vit eru ein stovnur, sum samstarvar millum stovur, vit kalla okkum fyri ein opnan stovn. Har vit leggja stóran dent á, at vit vaksnu eru nærverandi og virkin saman við børnunum. Okkara ynski er at geva børnunum ein tryggan gerandisdag og at skapa góðar umstøður, har børnini kunnu mennast, granska og uppliva heimin. Við at arbeiða opið tvørtur um stovur meta vit, at børnini kunnu fáa góðar relatiónir til øll, stór sum smá.

Í okkara námsfrøðiliga arbeiði leggja vit stóran dent á, at síggja barni har tað er og leggja vit okkum eftir tørvinum hjá barninum.

Í dagligdegnum hava vit ymisk tiltøk á skrá, t.d. vitja vit ymiskar hallir tvær ferð um vikuna. Vit hava ein aktivan skúlabólk, sum hvørja viku før mennandi avbjóðingar og upplivingar. Árliga hava vit afturvendandi tiltøk, sum vit meta verða týdningarmikil fyri tað námsfrøðiliga arbeiði. Náttúran er okkara granni, vit eru nógv úti og brúka náttúruna í okkara námsfrøðiliga virksemi.

Vit vænta, at:

tú hevur hug og evni at menna námsfrøðiliga arbeiðið á stovninum
tú hevur góð samstarvs- og samskiftisevni og megnar at virka fyri góðum samstarvi við foreldur, børn og starvsfelagar
tú ert ágrýtin og hevur hug og evni at skapa ein fjølbroyttan, mennandi og tryggan gerandisdag fyri einstaka barnið
at tú megnar at arbeiða sjálvstøðugt og tekur ábyrgd og avgerðir, samstundis sum tú megnar at varðveita yvirlitið