URD

Umlættingar- og rehabiliteringsdepilin Urd liggur í Rólantsgøtu í Hoyvík. Depilin varð tikin í nýtslu í mai 2021 og skal hjálpa borgarum at vera heima sum longst. Á Urd eru 27 stuttíðarpláss. Eitt stuttíðarpláss er eitt tíðaravmarkað uppihald, har tú kanst fáa hjálp alt samdøgrið í eitt styttri tíðarskeið. Tilboðið kann fevna um fleiri ymisk átøk í mun til tín tørv og tína heilsustøðu, til dømis endurvenjing, tørvsmeting og umlætting til røkt og linnan.

Arbeiðsplássið

Sjúkrarøktarfrøðingur

Trívist tú í einari lærandi og mennandi mentan, har leiðslan tekur væl móti kreativum hugskotum og eggjar starvsfólki at gera tað, sum tey brenna fyri og duga best?

Vilt tú gerast partur av einum opnum, forvitnum, jaligum og samstarvssinnaðum toymi við sjúkrarøktarfrøðingum, heilsurøktarum, heilsuhjálparum, fysioterapeutum, ergoterapeutum og kostfakfólki?

Vilt tú saman við okkum arbeiða slóðbrótandi við tvørfakligum og samanhangandi tilboðum til heimabúgvandi borgarar?

Umlættingar- og rehabiliteringsdepilin Urd, sum er staðsettur í Hoyvík, savnar flestu stuttíðarplássini í Tórshavnar Kommunu á einum stað. Tað eru 27 pláss á deplinum.

Endamálið við Urd er, umframt umlætting og linnandi røkt, at veita borgarum í Tórshavnar Kommunu, sum eru 67 ár og eldri og sum hava tørv á rehabiliterandi og sjúkrarøktarfakligum átøkum alt samdøgrið, eitt samanhangandi tvørfakligt tilboð, ið stuðlar undir eitt virkið og innihaldsríkt lív, eisini tá stuttíðarskeiðið er av.

Vit bjóða góða innleiðslu, virknar og góðar starvsfelagar, eitt dynamiskt arbeiðspláss, góðar umstøður og møguleika at seta tín dám á og verða partur av menningini av Urd.

Førleikakrøv

Útbúgving og løggilding sum sjúkrarøktarfrøðingur
Hevur vilja og góð evni at samstarva tvørfakliga
Hevur góð samskiftisevni í skrift og talu og góðan telduførleika
Hevur hug og evni at arbeiða sjúkufyribyrgjandi, heilsustimbrandi og rehabiliterandi