Privatlívspolitikkur

Faktor Sp/f rekur Alfred í Føroyum. Alfred er ein skipan har fyritøkur kunnu lýsa størv leys, og umsøkjarar kunnu søkja um størv. Alfred verður rikin umvegis eina loyvisavtalu (franchise agreement) við Alfreð ehf., skrás. nr. 630217-0830, Laugavegur 176, 105 Reykjavík, Ísland (hereftir Alfreð ehf.). Niðanfyri skal “Alfred” skiljast sum Faktor Sp/f. Alfred skipanin kann nýtast frá Alfred Jobs appini og Alfred heimasíðuni, www.alfred.fo.

Persónupplýsingar eru ein og hvør upplýsing og meting, sum er knýtt ella kann knýtast at einum ávísum likamligum persóni, t.e. tí skrásetta.

Henda kunning um okkara viðgerð av persónsupplýsingum lýsir, hvussu vit viðgera tínar persónsupplýsingar og tíni lógarásettu rættindi. Serstakar viðskiftatreytir hava forrættindi framum hendan politikk.

Privatlívspolitikkurin hjá Alfred fevnir millum annað um, hvør hevur ábyrgdina av viðgerð av tínum persónupplýsingum, hvørjir persónupplýsingar verða savnaðir og við hvørjum endamáli, hvussu persónupplýsingar verða brúktar, hvussu trygdin verður tryggjað, og hvørji rættindi lógin um vernd av persónupplýsingum gevur tær sum brúkara.

Hesin Privatlívspolitikkur er galdandi fyri allar brúkarar (hereftir eisini nevndur “teg” ella “tú”) av Alfred appini (Alfred Jobs) og heimasíðuni (www.alfred.fo).

Brúkarar av Alfred eru umsøkjarar og starvsfólk hjá fyritøkum, sum rita inn á Alfred skipanina til tess at leita eftir ella lýsa við leysum størvum.

1.     Dátuábyrgdari

Ein dátuábyrgdari er tann, sum eina ella saman við øðrum ger av, til hvørji endamál og við hvørjum hjálpitólum persónupplýsingar kunnu viðgerast. Alfred er tí dátuábyrgdari fyri tær dátur, sum brúkarar skráseta í okkara skipanum.

Hetta er galdandi bæði viðvíkjandi teimum persónupplýsingum sum tú letur okkum sum einstaklingur, verið seg tá tú leitar eftir starvi ella sendir inn umsókn um starv á Alfred, og teimum persónupplýsingum sum tú letur okkum, tá tú umboðar ein arbeiðsgevara, og vegna hann stovnar fyritøkuvanga, starvslýsing, ella viðgerð innkomnar umsóknir í Alfred skipanini.

Um tú søkir starv umvegis Alfred, so gerst arbeiðsgevarin sjálvstøðugur dátuábyrgdari fyri teir persónsupplýsingar, sum tú letur honum umvegis Alfred.

2.     Hvussu vit savna persónupplýsingar

Vit innsavna tínar persónsupplýsingar á ymiskan hátt. Vanliga fáa vit upplýsingarnar beinleiðis frá tær, tá tú skrásetir teg í Alfred skipanini; tað verið seg í Alfred Jobs appini ella á Alfred heimasíðuni. Í summum førum, serliga tá tað snýr seg um starvsfólk hjá fyritøkum, kunnu leiðarar geva starvsfólki atgongd til Alfred skipanina, og tað verður hereftir lagt til grund, at hetta er sambært samtykki frá ella starvssáttmála við viðkomandi starvsfólk.

Tú hevur altíð rætt til at vita, hvaðani vit innsavna upplýsingar um teg.

3.     Hvørjar persónupplýsingar verða savnaðar og hvussu verða tær viðgjørdar

Alfred savnar og viðgerð persónupplýsingar hjá brúkarum, sum eru neyðugar til tess at knýta saman persónar og fyritøkur viðvíkjandi størvum. Hesar upplýsingar kann Alfred savna um brúkarar:

3.1 Upplýsingar sum brúkarin sjálvur skrásetur

Samleikaupplýsingar: navn, bústað, telefonnummar og teldupostbústað.

3.1.1. Upplýsingar um umsøkjarar

Upplýsingar sum brúkarar leggja í eitt lívsrensl (CV) ella fylgibræv: til dømis upplýsingar um útbúgving, fyrrverandi størv, viðmæli v.m.

Samskiftisupplýsingar: upplýsingar um títt samskifti við Alfred og/ella starvsfólk hjá fyritøku viðvíkjandi umsókn um leys størv.

Mynstringarupplýsingar: upplýsingar um tína starvsetan, so sum dagfesting tá setanin byrjar, setanarbrøk, bankaupplýsingar, eftirlønarfelag, fakfelag v.m.

3.2.       Upplýsingar um tína tóleind og virki í Alfred appini og á heimasíðuni

Alfred nýtir kennifílur (cookies) til tess at greina ferðsluna á heimasíðuni og appini. Vit skráseta til dømis talið av síðum sum tú vitjar, hvussu longi tú støðast á síðuni, hvørjar síður tú vitjar, endurvitjanir, osv. Nærri fæst at vita um hetta í politikki okkara um kennifílur.

Upplýsingar um gerðir tínar í Alfred skipanini: Tá tú brúkar Alfred skipanina, uttan mun til um tað er umvegis appina ella heimasíðuna, fáa vit upplýsingar so sum yvirlit yvir tínar starvsumsóknir, boð millum teg og arbeiðsgevarar, og um tíni starvsmerki.

Upplýsingar um tóleind: Fáa vit fráboðan um tøkniligt óreglusemi ella umbøn um hjálp, tá tú nýtir appina, fáa vit upplýsingar um útgávuna av appini sum tú nýtir, hvat slag av telefon ella teldil tú nýtir, herundir operativskipan og hardware, og aðrar neyðugar upplýsingar til tess at rætta feilir í okkara forritum og bøta okkara vørur og tænastur.

Fáa vit líknandi fráboðanir umvegis web-kagan, fáa vit upplýsingar um operativskipanina og kagan sum tú nýtir, hvussu leingi skipanin var nýtt í støðuni, web-adressuna (URL) og aðrar neyðugar upplýsingar, til dømis til tess at rætta feilir í okkara forritum og bøta okkara vørur og tænastur.

Vit nýta IP-adressuna til tess at verja okkara heimilaðu áhugamál og til tess at viðgera tøkniligt óreglusemi. Hetta loyvir okkum millum annað, at bøta og menna okkara heimasíðu og app og harvið okkara tænastu til brúkarar.

Aðrar upplýsingar: Alfred kann viðgera aðrar upplýsingar um teg, sum eru neyðugar til tess at Alfred kann veita sínar tænastur ella verja síni heimilaðu áhugamál, og er omanfyristandandi tí ikki tømandi.

4.     Hvat er endamálið hjá Alfred við at viðgera persónupplýsingar

Endamálið hjá Alfred við at viðgera persónupplýsingar er at veita tær okkara tænastur á okkara heimasíðu og app. Viðgerðin fevnir millum annað um at:

  1. Góðkenna brúkarar, tá teir rita inn í Alfred skipanina
  2. Savna viðkomandi upplýsingar um brúkarar, sum teir sjálvir skráseta á einum vanga, ella sum eru partur av viðfestum til ein vanga, til dømis eitt CV ella fylgiskjal. Hetta gera vit fyri at starvsfólk hjá fyritøkuni fáa nøktandi upplýsingar til at meta um umsóknir, og soleiðis at umsøkjarar kunnu geva upplýsingar, sum kunnu økja sannlíkindini fyri at teir fáa tað starv, sum teir hava størst áhuga í.
  3. Samskifta við teg og seta teg føran fyri at samskifta við aðrar brúkarar av Alfred.
  4. Menna okkara vørur og tænastur.
  5. Fremja marknaðarføring og sølufremjandi arbeiði fyri Alfred, til dømis við einum elektroniskum tíðindabrævi um okkara tænastur, boð um ætlaðar broytingar og betringar.
  6. Fremja hagfrøðiligar kanningar, so sum tá nýggjar vørur ella tænastur koma afturat, ella til tess at betra verandi vørur og tænastur.

5.     Viðgerðarheimild

Viðgerðarheimildin hjá Alfred er antin at halda avtaluna við brúkaran ella eitt beinleiðis samtykki. Persónupplýsingar kunnu eisini verða viðgjørdar til tess at uppfylla okkara løgfrøðiligu skyldur, og verja heimilaðu áhugamál okkara ella heimilað áhugamál hjá einum triðjaparti, so sum:

  • at taka samband við teg viðvíkjandi handilsviðskifti til sínámillum gagn, haruppií beinleiðis marknaðarføring;
  • at betra um okkara tænastur;
  • at rætta feilir sum koma fyri, tá tænastur okkara verða brúktar;
  • at tryggja okkum trygdaravrit og endurgerð av skipanum og dátum, tá brek kemur á skipanir;
  • at verja rættarkrøv hjá Alfred og viðskiftafólki okkara;
  • at meta um góðskuna á tænastum okkara grunda á nøgdsemiskanningar sum tú svarar;
  • at meta um úrslit av marknaðarføring, sum er rættað ímóti tær; og
  • at tryggja munadygga kundatænastu og munadygt arbeiðsavrik.

6.     Hvussu tryggja vit at persónupplýsingar eru neyvar, álítandi og tryggar

Alfred leggur stóra áherðslu á vernd av persónupplýsingum bæði gjøgnum fyrisitingarlig og tøknilig tiltøk. Alfred skipanin er sniðgivin við trygd og privatlívi í huganum. Brúkarar skráseta sínar egnu persónligu upplýsingar í Alfred skipanina. Í flestu førum er ongin millummaður uppíblandaður skrásetingina, og hetta verður gjørt til tess at økja um neyvleikan og hvussu álítandi upplýsingarnir eru. Brúkarar kunnu eisini rita inn á Alfred skipanina og strika ella broyta upplýsingar á teirra vanga.

Vit leggja okkum eftir at tryggja, at tey forrit sum vit brúka frá triðjapørtum liva upp til krøvini í lóg um vernd av persónupplýsingum. Vit gera eisini váðameting, har vit meta um vandatættir í kunningartrygdini viðvíkjandi persónupplýsingum, og vit fremja tiltøk, um tað er neyðugt. Vit hava harumframt ásett ein politikk fyri samfeldan rakstur, og ein trygdarpolitikk sum millum annað fevnir um atgongdarstýring, dátuviðgerðaravtalur, nettrygdarloysnir, atgongd til hølir, tagnar og trúnaðarskyldu, og útbúgving fyri starvsfólk hjá Alfred.

Hendir eitt trygdarbrot hjá Alfred, fylgja vit skipaðum og frammanundan ásettum mannagongdum og framferðarháttum, til dømis at fráboða til Dátueftirlitið og, um trygdarbrotið eftir øllum at døma hevur við sær stóran váða fyri rættindini hjá einkultpersónum, so fráboða vit tær um brotið.

Um tú heldur at tínar persónupplýsingar eru í vanda, at onkur hevur fingið atgongd til títt loyniorð ella aðrar upplýsingar, verður tú vinaliga biðin um at taka samband við okkum, til dømis við at senda ein teldupost til gdpr@alfred.fo.

7.     Hvørjum avhenda vit tínar persónupplýsingar

Tá umsøkjarar søkja starv, verða teirra persónupplýsingar avhendar til starvsfólk í fyritøkuni sum lýsir við starvinum, hetta uttan mun til um hesi starvsfólk eru í Føroyum ella uttanlands. Í tann mun at hetta er neyðugt í arbeiðinum, hava starvsfólk hjá Alfred eisini atgongd til persónupplýsingar hjá brúkaranum.

Tekur tú eina senda umsókn aftur í Alfred skipanini ella stongir tú tín persónliga vanga, verður atgongdin hjá fyritøkuni til umsóknina í Alfred skipanini beinanvegin stongd. Annars verður umsóknin atkomilig hjá fyritøkuni í Alfred skipanini í eitt ár frá tí at umsóknin varð send fyritøkuni. Hereftir verður atgongdin hjá fyritøkuni strikað.

Við tí endamáli at menna og undirstuðla okkara tænastur, kunnu vit geva føstum mennarum hjá Alfred, samstarvspørtum sum veita okkum viðlíkahalds- og supporttænastur, tænastur til marknaðarføring, og cloud tænastur, atgongd til ella veita teimum avrit av persónligum upplýsingum hjá brúkarum. Hesir fyrrnevndu samstarvspartar eru dátuviðgerar fyri Alfred, og vit gera serligar dátuviðgerðaravtalur við teir viðvíkjandi viðger av persónupplýsingum hjá brúkarum.

Brúka fyritøkur eina skipan sum verður umsitin av einum triðjaparti, til dømis eina HR-skipan, hevur Alfred heimild at flyta avrit av persónupplýsingum hjá umsøkjarum ið fyritøkan setir í starv, beinleiðis til slíkar skipanir, um fyritøkan biður um hetta. Við slíkari flyting gerst fyritøkan sjálvstøðugur dátuábyrgdari av persónupplýsingum. Harumframt kunnu tínar persónupplýsingar blíva fluttar til okkara løgfrøðiligu ráðgevarar í sambandi við at gera sáttmálar ella greiða ósemjur, og til eksternar grannskoðarar og skattaráðgevarar. Í slíkum førum seta vit hóskandi tiltøk í verk til tess at tryggja at persónupplýsingarnar eru vardar, til dømis við at gera avtalur.

Vit tryggja at viðgerðin av tínum persónupplýsingum, verður hon flutt til nevndu samstarvspartar, fer fram innan fyri limalond í Evropeiska Samveldinum (ES) ella Evropeiska Búskaparliga Samstarvinum (EBS), ella í londum, ið sambært kunngerð frá Landsstýrinum verða mett at hava nøktandi verndarstøði viðvíkjandi flutningi av persónupplýsingum.

Harumframt kunnu vit lata myndugleikum ella øðrum persónupplýsingar, um hetta er grundað á eina løgliga skyldu, ásetingar í sáttmálum, ella heimilaðu áhugamál okkara ella triðjamans.

8.     Hvussu leingi goyma vit persónupplýsingar

Alfred goymir tínar persónupplýsingar so leingi tað er neyðugt og viðkomandi til tess at røkka endamálinum við viðgerðini, sum lýst omanfyri, ella um ein løglig skylda ella løglig áhugamál hjá Alfredi ella einum triðjaparti krevja tað.

Brúkarar í Alfred skipanini kunnu sjálvir velja at taka burtur/strika persónupplýsingar á egnum vanga, tá teir vilja. Avgerð tú at gera tað, hvørva upplýsingarnar beinanvegin av Alfred heimasíðuni og úr Alfred Jobs appini, men vit goyma upplýsingarnar í okkara dátugrunni í 30 dagar harútyvir. Hetta gera vit til tess at kunna endurstovna upplýsingarnar, um tú hevur strika, til dømis av misgáum, ella um tú skuldi broytt hugsan. Aftaná 30 dagar verða upplýsingarnar strikaðir frá okkara dátugrunni og kunnu tá ikki longur endurskapast.

Alfred strikar tínar persónupplýsingar, um (i) tað ikki longur er neyðugt at goyma tær til tað endamál, sum tær vóru fingnar til vega og viðgjørdar, (ii) viðgerðin er ólóglig, (iii) tú mótmælir viðgerðini, og tað ikki eru heimilaðar orsøkir til viðgerðina, sum ganga framum tíni rættindi, (iv) strikingin er lógarkravd, ella (v) tú hevur tikið samtykki til viðgerðina av tínum persónupplýsingum aftur.

Í nøkrum førum, m.a. vegna punktini (i)-(v) omanfyri, kann tað tó vera neyðugt at goyma persónupplýsingar í eitt longri tíðarskeið, serstakliga um vit hava tørv á teimum til tess at verja okkara heimilaðu áhugamál ella vegna eina skyldu sambært lóg. Í slíkum førum goyma vit bert tær persónupplýsingar sum eru neyðugar til hetta endamál og strika tær so skjótt sum tað er gjørligt.

9.     Tíni rættindi sambært dátuverndarlógini

Dátuverndarlóggávan gevur skrásettum einstaklingum ymisk rættindi, m.a. til upplýsingar um hvørt og hvussu vit viðgera tínar persóndátur. Slík rættindi kunnu tó vera avmarkað av m.ø. lóggávu, áhugamálum hjá øðrum, ella heimilaðu áhugamálunum hjá Alfred. Í broti 9.1.-9.3. verða hesi rættindi stutt umrødd, uttan at hetta er ein tømandi uppreksan, og uttan at komið verður nærri inn á møguligar løgligar avmarkingar av hesum rættindum.

Eru ongar avmarkandi umstøður, tá ger Alfred eftir áheitanum viðvíkjandi niðanfyristandandi rættindum ókeypis, uttan so at áheitanin er ógrundað, órímilig í vavi, ella biðið verður um meira enn eitt avrit av persónupplýsingunum. Í hesum seinnu førunum kann Alfred annaðhvørt treyta sær sær eitt rímiligt ómaksgjald vegna kostnaðin, ella nokta umbønini.

9.1. Rætturin til innlit og dátuflutning

Tú hevur rætt til at fáa upplýst, hvørt Alfred viðgerð persónupplýsingar um teg og hvørjar upplýsingar vit hava um teg. Harumframt hevur tú rætt til at fáa atgongd til hesar upplýsingar.

Rætturin til innlit krevur tó at vit kunnu eyðmerkja serstøku upplýsingarnar um teg. Tað kann tískil vera neyðugt hjá tær at geva okkum supplerandi upplýsingar, um so er at vit ikki kunnu eyðmerkja teg út frá teimum upplýsingunum vit hava.

Tú hevur eisini rætt til ávísar minstuupplýsingar um skipan av dátuviðgerðum, sum m.a. eru veittar við hesum politikki.

Tá dátur verða viðgjørdar grunda á samtykki ella avtalu, hevur tú rætt til at fáa tær persónupplýsingar, sum tú hevur latið okkum, lætnar tær ella einum øðrum dátuábyrgdara í einum skipaðum, vanliga nýttum og teldutøkum sniði.

9.2  Rætturin til rætting og striking

Í flestu førum kunnu brúkarar sjálvir rætta og strika sínar persónupplýsingar í Alfred skipanini, men í teimum førum har hetta ikki er galdandi, hevur tú rætt til at biðja um at fáa rættað persónsupplýsingar, sum eru rangar ella villleiðandi, soleiðis at vit ikki viðgera upplýsingar um teg, sum eru skeivar ella ófullfíggjaðar.

Í serligum føri hevur tú rætt til at biðja um at fáa strikað persónsupplýsingar, sum vit hava um teg. Rætturin er ikki treytaleysur, tá ávísir upplýsingar ikki mugu strikast grundað á aðra lóggávu, ella um avtala og ávíst endamál gevur okkum rætt til at varðveita og viðgera persónupplýsingarnar.

9.3  Rætturin til mótmæli og viðgerðaravmarking

Tú kanst átala, at persónsupplýsingar um teg verða viðgjørdar, grunda á tínar ítøkiligu umstøður, tá upplýsingarnar verða viðgjørdar grunda á okkara heimilaðu áhugamál ella heimilaði áhugamál hjá triðja parti. Um átalan má metast heimilað, skulu persónupplýsingarnar um teg ikki viðgerast. Tó kunnu upplýsingarnar møguliga framvegis nýtast til at viðgera møgulig onnur lóglig endamál.

Tú hevur eisini rætt til at mótmæla viðgerð viðvíkjandi tær, hvørs endamál er beinleiðis marknaðarføring, og verður viðgerin til slíkt endamál tá steðga.

Í serligum føri, eitt nú um tað er ósemja um hvørt upplýsingarnar eru álítandi, hevur tú rætt til at biðja um at fáa viðgerðina av tínum persónsupplýsingum avmarkaða. Hetta merkir, at um treytirnar til viðgerðaravmarking eru uppfyltar, kunnu vit einans viðgera tínar persónsupplýsingar til hesi avmarkaðu endamál.

10.  Samskiftisupplýsingar

Hevur tú spurningar ella viðmerkingar til viðgerðina hjá Alfred av persónligum upplýsingum, kanst tú senda ein teldupost til persónverndarfólkið hjá Alfred á gdpr@alfred.fo.

Tú hevur eisini rætt til at klaga til Dátueftirlitið, um tað er ósemja um handfaringina av tínum persónupplýsingum. Vit vóna tó, at tú setir teg í samband við okkum fyrst við spurningum viðvíkjandi privatlívsfriðinum, so vit kunnu hjálpa tær. Ynskir tú heldur at seta teg beinleiðis í samband við Dátueftirlitið, kanst tú senda ein teldupost til dat@dat.fo.

11.  Endurskoðan av Privatlívspolitikkinum

Alfred tilskilar sær rætt til at endurskoða og broyta sín Privatlívspolitikk eftir tørvi, so hann til hvørja tíð avspeglar viðgerðina av persónupplýsingum. Broytingar í Privatlívspolitikkinum hjá Alfred verða kunnaðar á heimasíðuni hjá Alfred og á Alfred Jobs appini.

Hesin Privatlívspolitikkur hevur gildi frá og við 6. desember 2023.