Skrivstovufólk

Vilt tú arbeiða í einum óformellum og dynamiskum arbeiðsumhvørvi við góðum og hjálpsomum starvsfeløgum og fjølbroyttum og fakliga avbjóðandi arbeiðsuppgávum? So er tað kanska júst tíni umsókn, vit bíða eftir.

Útlendingastovan søkir eftir skrivstovufólki at byrja 1. januar 2026 ella eftir nærri avtalu. Starvið er eitt fulltíðarstarv.

Um starvið

Høvuðsuppgávurnar verða millum annað telefonavgreiðsla, avgreiða og vegleiða viðskiftafólki, journalisering, málsviðgerð av m.a. umsóknum um arbeiðs- og uppihaldsloyvi og familjusameining umframt annað fyrifallandi skrivstovuarbeiði.

Vit bjóða tær

Sum starvsfólk á Útlendingastovuni verður tú partur av dugnaliga starvsfólkahópinum á Útlendingastovuni, ið telur 13 fólk í løtuni. Harafturat verður tú partur av starvsfólkahópinum hjá Vinnustovninum, ið telur umleið 45 fólk. Vit eru eitt óformelt, dynamiskt og sosialt arbeiðspláss, har vit gera nógv saman. Vit koma hvørjum øðrum við og leggja stóran dent á at lyfta í felag. Til tíðir er arbeiðstrýstið størri, og tá taka vit øll eitt eyka tak, men afturfyri ber til at arbeiða minni aðrar tíðir.

Vit eru eisini eitt lagaligt arbeiðspláss, har tú – við ábyrgd og atliti til tínar starvsfelagar – kanst skipa tín egna arbeiðsdag.

Vit leggja stóran dent á samstarv, vitanarskifti og at menna okkum fakliga ígjøgnum alt arbeiðslívið, og tí eru eisini góðir møguleikar fyri førleikamenning og luttøku á viðkomandi skeiðum.

Um teg

Tú hevur helst skrivstovuútbúgving ella royndir, sum eru sambæriligar. Tað er ein fyrimunur við royndum innan almenna fyrisiting.

Tú hevur góð samstarvsevnir, tekur ábyrgd og ert røkin.

Tú dugir væl at orða teg í skrift og talu á føroyskum, donskum og enskum.

Løn og setanartreytir

Starvið verður sett sambært sáttmála millum Fíggjarmálaráðið og avvarðandi yrkisfelag. Tann, ið settur verður, má kunna tola broytingar í starvinum, og at økið verður umskipað til eisini at fevna um aðrar uppgávur.

Hevur hetta tín áhuga?

Send okkum eina umsókn við prógvum, CV og møguligum viðmælum til: solvad@utlendingastovan.fo

Umsóknin skal vera merkt “skrivstovufólk”.

Vilt tú hava meira at vita um starvið, kanst tú venda tær til Sólvá Dam, deildarleiðara, á tel. 356048 ella solvad@utlendingastovan.fo

Um Útlendingastovuna

Útlendingastovan viðger umsóknir frá útlendingum um arbeiðs- og uppihaldsloyvi og familjusameining og vegleiðir um viðurskifti hjá útlendingum í Føroyum.

Nærri kunning um Útlendingastovuna sæst á www.utlendingastovan.fo